NewsHub

پاکستان نے دبئی ٹیسٹ میں نیوزی لینڈ کو فالو آن کرا دیا

Posted on November 26, 2018 By Majid Khan اسلام آباد, اہم ترین, کھیل

Dubai Test

اسلام آباد (جیوڈیسک) دبئی ٹیسٹ میں نیوزی لینڈ کی ٹیم اپنی پہلی اننگز میں 90 رنز بنا کر فالو آن کا شکار ہو گئی جس کے بعد اس کی دوسری اننگز میں بیٹنگ جاری ہے۔

دبئی ٹیسٹ کے تیسرے روز یاسر شاہ نے تباہ کن بولنگ کا مظاہرہ کرتے ہوئے کسی کیویز بلے باز کو کریز پر زیادہ دیر کھڑے ہونے نہ دیا اور 41 رنز کے عوض 8 کھلاڑیوں کو پویلین کی راہ دکھائی۔

کین ولیمسن کی قیادت میں کیویز ٹیم اپنی پہلی اننگز میں صرف 90 رنز پر ڈھیر ہوگئی جس میں 6 بلے باز بغیر کوئی رنز بنائے آؤٹ ہوئے۔

یاسر شاہ نے نیوزی لینڈ کے خلاف اپنے ٹیسٹ کیرئیر کی بہترین بولنگ کی، اس سے قبل انہوں نے سری لنکا کے خلاف 2015 میں 74 رنز کے عوض 7 وکٹیں حاصل کی تھیں۔

قومی ٹیم کو نیوزی لینڈ پر 328 رنز کی برتری حاصل ہوئی تو کپتان سرفراز احمد نے فالو آن کرانے کو ترجیح دی۔

اس سے قبل دبئی انٹرنیشنل اسٹیڈیم میں دونوں ٹیمیں ایک گھنٹہ تاخیر سے میدان میں اتریں تو کیویز نے 24 کے مجموعی اسکور سے اننگز کا آغاز کیا، جیت راول 17 اور ٹام لیتھم 5 رنز کے ساتھ کریز پر موجود تھے۔

دونوں بلے بازوں نے محتاط انداز اپناتے ہوئے اسکور کو آگے بڑھایا لیکن یاسر شاہ کی عمدہ بولنگ کے سامنے کوئی بیٹسمین زیادہ دیر تک کریز پر نہ رک پایا۔

گزشتہ روز پاکستان نے کھیل کے دوسرے روز اپنی پہلی اننگز 418 رنز 5 کھلاڑی آؤٹ پر ڈکلئیر کردی تھی جس کے بعد کیویز اوپننگ بلے باز جیت راول اور ٹام لیتھم نے محتاط انداز سے کھیلتے ہوئے 24 رنز بنائے۔

اس سے قبل پاکستان نے 418 رنز 5 وکٹ پر اپنی پہلی اننگز ڈکلیئر کی تو بابراعظم 127 اور کپتان سرفراز احمد 30 رنز کے ساتھ وکٹ پر موجود تھے، قومی ٹیم کی جانب سے حارث سہیل نے 147 رنز کی اننگز کھیلی۔

Read More
  • 280
Loading ···
No more